ບົດນໍາ
ຊຸມຊົນ Lao Network Operators Group (LANOG) ມີຄວາມຕັ້ງໃຈທີ່ຈະສົ່ງເສີມການຮ່ວມມື, ການແບ່ງປັນຄວາມຮູ້ ແລະ ຄວາມເຂົ້າໃຈລະຫວ່າງ ຜູ້ປະກອບການເຄືອຂ່າຍພາຍໃນປະເທດລາວ. ເພື່ອສ້າງສະພາບແວດລ້ອມທີ່ປອດໄພ ແລະ ເປັນມິດສໍາລັບຜູ້ເຂົ້າຮ່ວມທຸກທ່ານ, ພວກເຮົາຈຶ່ງໄດ້ສ້າງຕັ້ງຫລັກຈັນຍາບັນຕໍ່ໄປນີ້ ເພື່ອຊີ້ໃຫ້ເຫັນເຖິງຄວາມຄາດຫວັງຕໍ່ພຶດຕິກໍາພາຍໃນຊຸມຊົນຂອງເຮົາ.
ຂອບເຂດ
ຫລັກຈັນຍາບັນນີ້ໃຊ້ກັບທຸກກິດຈະກຳຂອງ LANOG ໃນແພັດຟອມອອນໄລນ໌ ແລະ ການສື່ສານຂອງຊຸມຊົນ ໂດຍບໍ່ຈໍາກັດພຽງແຕ່ການປະຊຸມແບບໂຕຕໍ່ໂຕ, ແບບຝຶກອົບຮົບ ແລະ ເວທີສົນທະນາອອນໄລນ໌ ຕ່າງໆ.
ພຶດຕິກຳທີ່ຄາດໄວ້
- ການສື່ສານດ້ວຍຄວາມເຄົາລົບ: ປະຕິບັດຕໍ່ສະມາຊິກທຸກຄົນດ້ວຍຄວາມເຄົາລົບ. ເຊິ່ງລວມທັງການນໍາໃຊ້ພາສາທີ່ບໍ່ແບ່ງແຍກ, ການຕັ້ງໃຈຟັງ ແລະ ການໃຫ້ຄວາມສໍາຄັນກັບມຸມມອງທີ່ຫລາກຫລາຍ.
- ການມີສ່ວນຮ່ວມຢ່າງສ້າງສັນ: ສ່ວນຮ່ວມໃນການສົນທະນາຢ່າງຈິງຈັງ, ໂດຍ ໃຫ້ການຮ່ວມມື ແລະ ສະຫນັບສະຫນູນ. ເລັ່ງໃສ່ການແກ້ໄຂບັນຫາ ແລະ ແບ່ງປັນຄວາມຮູ້ ຫລາຍກວ່າການວິພາກວິຈານບຸກຄົນອື່ນ.
- ການລວມຕົວ: ຍິນດີຕ້ອນຮັບ ແລະ ຊຸກຍູ້ການມີສ່ວນຮ່ວມຈາກທຸກຄົນ, ໂດຍບໍ່ຄໍານຶງເຖິງພື້ນຖານ, ຕົວຕົນ, ຫຼື ລະດັບຄວາມຊໍານານຂອງພວກເຂົາ. ຈົ່ງມີສະຕິຕໍ່ການນໍາໃຊ້ພາສາ ແລະ ພຶດຕິກຳທີ່ອາດສ້າງຄວາມແບ່ງແຍກໃຫ້ແກ່ຄົນອື່ນ.
- ຄວາມເຫັນອົກເຫັນໃຈ ແລະ ຄວາມເມດຕາ: ຊຸກຍູ້ໃຫ້ສະມາຊິກສະແດງຄວາມເຫັນອົກເຫັນໃຈ ແລະ ຄວາມມີເມດຕາເຊິ່ງກັນ ແລະ ກັນ, ລວມເຖິງການສະແດງຄວາມຄິດເຫັນ ແລະ ຍອມຮັບຄໍາວິຈານຢ່າງມີສັນຕິ.
- ຄວາມເປັນມືອາຊີບ: ຮັກສາຄວາມເປັນມືອາຊີບໃນທຸກການສື່ສານ. ເຊິ່ງລວມເຖິງຄວາມສຸພາບ, ກົງຕໍ່ເວລາ, ການຕອບສະໜອງ, ແລະ ປະຕິບັດຕາມຄຳໝັ້ນສັນຍາ.
- ການຮັກສາຄວາມລັບ: ເຄົາລົບຄວາມເປັນສ່ວນຕົວຂອງຄົນອື່ນ ໂດຍການຮັກສາຂໍ້ມູນສ່ວນຕົວທີ່ຖືກແບ່ງປັນພາຍໃນຊຸມຊົນໃຫ້ເປັນຄວາມລັບ, ເວັ້ນເສຍແຕ່ໄດ້ຮັບການອະນຸຍາດໃຫ້ແບ່ງປັນຕໍ່ຢ່າງຊັດເຈນ.
ພຶດຕິກໍາທີ່ບໍ່ສາມາດຍອມຮັບໄດ້
- ການຄຸກຄາມ: ການຄຸກຄາມບໍ່ວ່າໃນຮູບແບບໃດກໍ່ຕາມ ລວມເຖິງການເວົ້າດູຖູກ, ການໂຈມຕີສ່ວນບຸກຄົນ ແລະ ການລ່ວງລະເມີດ ຖືວ່າເປັນສິ່ງຕ້ອງຫ້າມຢ່າງເດັດຂາດ.
- ການເລືອກປະຕິບັດ: ການເລືອກປະຕິບັດໂດຍອີງໃສ່ເຊື້ອຊາດ, ເພດ, ລົດສະນິຍົມທາງເພດ, ສາດສະໜາ, ສັນຊາດ ຫຼື ສະຖານະພາບອື່ນໆ ແມ່ນເປັນສິ່ງທີ່ບໍ່ສາມາດຍອມຮັບໄດ້.
- ພຶດຕິກໍາກໍ່ກວນ: ການຮຸກຮານ, ການຂົ່ມຂູ່ ແລະ ການກະທໍາກໍ່ກວນ ທີ່ຂັດຂວາງການມີສ່ວນຮ່ວມຂອງຄົນອື່ນ ແມ່ນເປັນສິ່ງທີ່ບໍ່ສາມາດຍອມຮັບໄດ້.
- ການບິດເບືອນ: ຫ້າມບິດເບືອນອົງກອນ, ຄຸນະສົມບັດ ຫລື ປະສົບການຂອງຕົນເອງ ພາຍໃນບໍລິບົດຂອງຊຸມຊົນ.
- ການບັນທຶກທີ່ບໍ່ໄດ້ຮັບອະນຸຍາດ: ບໍ່ໃຫ້ບັນທຶກການປະຊຸມ ຫຼື ເຫດການໃດໆ ເວັ້ນເສຍແຕ່ໄດ້ຮັບການອະນຸຍາດຈາກຜູ້ເຂົ້າຮ່ວມທັງໝົດ.
ຜົນສະທ້ອນຂອງພຶດຕິກໍາທີ່ບໍ່ສາມາດຍອມຮັບໄດ້
ການລະເມີດຫລັກຈັນຍາບັນນີ້ຈະຖືກດໍາເນີນແກ້ໄຂໂດຍທັນທີ. ໂດຍອີງຕາມຄວາມຮຸນແຮງຂອງການລະເມີດ, ເຊິ່ງຜົນສະທ້ອນອາດຈະປະກອບມີ:
- ກ່າວຕັກເຕືອນສ່ວນຕົວ
- ການຖອນຊົ່ວຄາວ ຫຼື ຖາວອນອອກຈາກ ແພັດຟອມອອນໄລນ໌ ຫຼື ກິດຈະກໍາຕ່າງໆ
- ລາຍງານໃຫ້ອົງການວິຊາສະເພາະ ຫຼື ເຈົ້າໜ້າທີ່ຮັບຮູ້ ຖ້າຈໍາເປັນ
ການລາຍງານພຶດຕິກໍາ
ຖ້າຫາກທ່ານພົບເຫັນ ຫຼື ປະສົບກັບພຶດຕິກຳທີ່ຂັດກັບຫຼັກຈັນຍາບັນນີ້, ສາມາດລາຍງານທັນທີໃຫ້ທີມງານຂອງ LANOG, ບໍ່ວ່າຈະເປັນທາງອີເມວ Enable javascript ຫຼື ຕິດຕໍ່ໂດຍກົງກັບໃຜກໍຕາມທີ່ພົບເຫັນຢູ່ໃນຫນ້າຫລັກ “ທີມງານຊຸມຊົນ”.
ຖ້າບຸກຄົນທີ່ທ່ານຕ້ອງການລາຍງານ ຢູ່ໃນທີມງານຊຸມຊົນຂອງພວກເຮົາ, ສາມາດຕິດຕໍ່ຫາສະມາຊິກທີມງານຊຸມຊົນອື່ນໆໄດ້, ຫຼື ຖ້າຕ້ອງການ (ອີງຕາມຄວາມຮຸນແຮງຂອງການຮຽກຮ້ອງ) ສາມາດລາຍງານຫາ ອໍານາດການປົກຄອງທ້ອງຖິ່ນ.
LANOG ໃຫ້ບູລິມະສິດແກ່ການເກັບຮັກສາຄວາມລັບຂອງຜູ້ລາຍງານ, ຮັບປະກັນວ່າຕົວຕົນຂອງເຂົາເຈົ້າ ຈະບໍ່ຖືກເປີດເຜີຍຕໍ່ຜູ້ທີ່ໄດ້ຖືກລາຍງານ.
ສະຫຼຸບ
ໂດຍການເຂົ້າຮ່ວມໃນຊຸມຊົນ LANOG, ຖືວ່າທ່ານຕົກລົງທີ່ຈະຢຶດໝັ້ນຕາມຫຼັກຈັນຍາບັນນີ້. ຮ່ວມກັນສ້າງສະພາບແວດລ້ອມທີ່ອົບອຸ່ນ, ສະຫນັບສະຫນູນການຮຽນຮູ້ ແລະ ການຮວມມືກັນ.